हेटौँडामा ‘सजिलो राइड सेयरिङ’ सेवा सुरु, यात्रुलाई सहज आवागमनको अपेक्षा

हेटौँडा : राइड सेयरिङ सेवामा सक्रिय ‘सजिलो’ एपले मकवानपुरको हेटौँडामा आफ्नो सेवा औपचारिक रूपमा विस्तार गरेको छ। बागमती प्रदेशको राजधानी समेत रहेको हेटौँडामा यात्रुलाई सहज, सुरक्षित र प्रविधिमैत्री यातायात सेवा प्रदान गर्ने उद्देश्यसहित सेवा सुरु गरिएको कम्पनीले जनाएको छ।

कम्पनीका अनुसार, सजिलो एपमार्फत अब हेटौँडाका यात्रुहरूले मोबाइल एप प्रयोग गरी छिटो र सहज रूपमा सवारी बुक गर्न सक्नेछन्। सेवा सञ्चालनसँगै स्थानीय स्तरमै रोजगारीका अवसर सिर्जना हुने र यातायात व्यवस्थापनमा समेत सकारात्मक प्रभाव पर्ने अपेक्षा गरिएको छ।

सजिलो एपले हेटौँडामा सेवा विस्तारसँगै चालक र यात्रु दुबैका लागि सुरक्षित तथा भरपर्दो प्लेटफर्म उपलब्ध गराउने दाबी गरेको छ। एपमा जीपीएस ट्र्याकिङ, पारदर्शी भाडा निर्धारण, तथा प्रयोगकर्ता मैत्री इन्टरफेसजस्ता सुविधाहरू समावेश गरिएको कम्पनीले जनाएको छ।

मकवानपुर जिल्लाभरि सेवा विस्तार गर्ने योजनाअनुसार आगामी दिनमा अन्य स्थानीय तहमा पनि सेवा विस्तार गरिने जानकारी दिइएको छ। यससँगै परम्परागत यातायात प्रणालीलाई आधुनिक प्रविधिसँग जोड्दै सेवा गुणस्तरमा सुधार ल्याउने लक्ष्य राखिएको कम्पनीले उल्लेख गरेको छ।

स्थानीयवासीले भने नयाँ सेवा सुरु भएसँगै आवागमनमा सहजता आउने विश्वास व्यक्त गरेका छन्। साथै, प्रतिस्पर्धात्मक वातावरण सिर्जना भई सेवा गुणस्तर अझ सुधार हुने अपेक्षा गरिएको छ।